Bakıda COP29 çərçivəsində “ClimateScanner” layihəsinin nəticələri təqdim ediləcək. Bu haqda bu gün, 27 iyul tarixində Bakuplus.az APA-ya istinadən xəbər verir.
Ali Audit Orqanlarının Beynəlxalq Təşkilatı (INTOSAI) çərçivəsində Braziliya və 17 ölkəni təmsil edən AAO tərəfindən hazırlanmış iqlim siyasətlərinin auditi üçün qlobal metodologiya olan “ClimateScanner” layihəsinin nəticələri bu il Bakıda keçiriləcək COP29 tədbirində təqdim ediləcək.
Bununla əlaqədar, BMT-nin Baş Katibi Antonio Quterreş Braziliya AAO-nun sədri Bruno Dantası Nyu-Yorkdakı mənzil-qərargahda qəbul edib. Görüş zamanı Bruno Dantas ClimateScanner (İqlim Skaneri) layihəsinin cari vəziyyətinə dair məlumatları Baş Katibə təqdim edib. Dantas qeyd edib ki, “ClimateScanner” layihəsinə 127 ölkə qoşulub. Bildirilib ki, həmin ölkələrin AAO-ları üçün nəzərdə tutulmuş təlimlərdən sonra müvafiq qiymətləndirmələrin aparılması planlaşdırılır.
