COP29 tədbirinə kimi Bakıya 160 yeni elektrikli avtobus gətirilərək istifadəyə veriləcək. Bunu bu gün, 11 iyul tarixində Azərbaycan Yerüstü Nəqliyyat Agentliyinin (AYNA) sədri Anar Rzayev deyib.
Rzayev onu da qeyd edib ki, ilin əvvəlində paytaxtda 200 yeni avtobus istismara verilib və bu yaxınlarda daha 200 avtobus yollara çıxarılacaq.
"Ümumilikdə Bakıda 360 avtobusun istifadəyə verilməsi nəzərdə tutulub. Qeyd edim ki, Bakının avtobus nəqliyyatı ilə bağlı AYNA yeni şəbəkə hazırlayıb. Bu şəbəkə şəhərin rəqəmsal əkizində simulyasiya edilib. Hazırda şəbəkənin tətbiqinə başlanılıb. İlk beş marşrut artıq istifadəyə verilib. Bunlar şəhərin uzaq məntəqələrini mərkəzlə əlaqələndirən, Hövsandan və Mərdəkandan işləyən marşrutlardır. Bu marşrutlar tədricən qanunvericiliyə müvafiq olaraq müsabiqədən keçirilməklə yenə istifadəyə veriləcək", – deyə AYNA-nın sədri açıqlayıb.
