Daha öncə xəbər verdiyimiz kimi, Nizami rayon İcra Hakimiyyəti başçısının köməkçisi Rauf Mehdiyev martın 11-dən 12-nə keçən gecə saat 23:00 radələrində intihar edib. İntiharla bağlı bəzi məqamları Bakuplus.az bu gün, 13 mart tarixində Qafqazinfo.az-a istinadən verir.
40 yaşlı Rauf Məhi oğlu Mehdiyevin asılı vəziyyətdə qalmış meyiti Suraxanı rayonu, Hövsan qəsəbəsindəki binalardan birinin girişində tapılıb və dərhal onun həmin binada yaşayan ailəsinə məlumat verilib.
Məlum olub ki, R.Mehdiyev həmin gün Nizami Rayon İcra Hakimiyyətində işdə olub. Şənbə günü olduğundan, yəni qısa iş günü ilə əlaqədar o, saat 13:00 radələrində iş yoldaşları ilə İcra Hakimiyyətinin qarşısında bir qədər söhbətləşdikdən sonra iş yerini tərk edib.
Rauf Mehdiyevin atası, Qarabağ Müharibəsi Əlilləri, Veteranları və Şəhid Ailələri İctimai Birliyinin Nizami rayon şöbəsinin sədri Məhi Mehdiyev oğlunun intihar etməsinin səbəbini bilmədiyini qeyd edib:
"Məni yandıran odur ki, Raufun heç bir problemi, dərdi, çatışmazlığı, zərərli vərdişləri yox idi. Gedib mağazadan bazarlıq edib, sonra kəndir alıb və özünü asıb. Raufun səbəbsiz intiharı mənim belimi qırdı", - deyə o bildirib.
Həmçinin bildirilib ki, R.Mehdiyev işlədiyi dövrdə özünü bacarıqlı və perspektivli kadr kimi göstərib. 2022-ci ildə Nizami Rayon İcra Hakimiyyətinə yeni başçı təyin olunarkən o, sabiq başçının köməkçisi olmasına baxmayaraq, vəzifədə saxlanılıb və icra başçısının köməkçisi kimi işini davam etdirib.
