Bakı Ağır Cinayətlər Məhkəməsində Binəqədi rayon bələdiyyəsinin sabiq sədri Aytac Əliyeva və onun bacısı İlknur Əliyevanın (Turkut) cinayət işi üzrə məhkəmə prosesi davam etdirilib. Bu haqda bu gün, 23 avqust tarixində Bakuplus.az APA-ya istinadən məlumat verir.
Hakim Rasim Sadıxovun sədrliyi ilə keçirilən iclasda təqsirləndirilən şəxsin vəkili A.Əliyeva barəsində seçilmiş həbs-qətimkan tədbirinin səhhətinə görə ev dustaqlığı ilə dəyişdirilməsi barədə vəsatət qaldırıb. Məlumata görə, məhkəmə bu vəsatəti təmin etməyib.
Proses oktyabrın 10-da davam edəcək.
Binəqədi rayon bələdiyyəsinin sabiq başçısı Aytac Əliyeva bacısı İ.Əliyeva ilə birgə qızıl alveri adı ilə vətəndaşlara qarşı dələduzluq etməkdə və 1 milyon manata yaxın vəsaiti mənimsəməkdə ittiham olunurlar.
Faktla bağlı “Dələduzluq külli miqdarda ziyan vurmaqla törədildikdə” maddəsi ilə cinayət işi başlanıb, bacılar barəsində həbs qətimkan tədbiri seçilib. Bundan əvvəl İlknur Əliyeva ev dustaqlığına buraxılıb.
