Kiberdələduzlar ailə üzvlərinin səsi ilə zəng vuraraq vətəndaşları aldadırlar. Bu, süni intellekt vasitəsi ilə reallaşdırılan yeni dələduzluq növüdür. Məqsəd isə eynidir - şəxsi məlumatları ələ keçirərək pul mənimsəməkdir. Bunu nəzərə alaraq, Daxili İşlər Nazirliyi vətəndaşları diqqətli olmağa çağırır. Bu haqda bu gün, 30 iyul tarixində Bakuplus.az ATV-yə istinadən məlumat verir.
“Vətəndaşlar bilməlidirlər ki, naməlum şəxs tərəfindən edilən təkliflər, qazanc vədləri tək məqsəd - vətəndaşın kart hesabındakı vəsaitin oğurlanması məqsədi daşıyır. Bunun üçün də vətəndaşlarımıza bir daha xəbərdarlıq edərək demək istəyirik ki, tanımadığınız şəxslərlə öz şəxsi və kart məlumatlarınızı bölüşməyin. Çünki süni intellekt vasitəsi ilə bank əməkdaşı kimi, həmçinin ailə üzvü kimi, qohum kimi sizinlə danışıqlar aparıla bilər”, - nazirliyin rəsmisi Elbrus İbrahimov vurğulayıb.
Bəs haradan bilək ki, bizə zəng vuran yaxınımız yox, kiberdələduzdur?
“Zəng artıq tanıdığımız şəxsin nömrəsindən gələ bilir, hətta səsini də təqlid edirlər. Bu zaman bizdən hər hansı bir fərdi məlumatlar istənilərsə, o zaman qarşı tərəfin etibarlılığını və doğruluğunu biz müxtəlif vasitələrlə təsdiq etməyə çalışmalıyıq”, - deyə İT üzrə mütəxəssis Fərhad Mirəliyev müvafiq detalları açıqlayıb.
İT üzrə mütəxəssis müxtəlif qurumlar adından edilən zənglər zamanı da diqqətli olmağı tövsiyə edir:
“Hansısa bir dövlət qurumu tərəfindən pul mükafatı vəd olunursa, yaxud da uduş, lotereya vəd olunursa, biz buna birbaşa inanmamalıyıq. Həmin qurumun özünə, onun mətbuat xidmətinin açıqlamalarına və yaxud da telefon vasitəsilə həmin şəxslərə zəng edərək, bu cür təklifin real olub-olmadığını bir daha dəqiqləşdirməliyik.”
Statistika göstərir ki, ölkəmizdə kiberdələduzların hədəf kütləsi, əsasən, orta yaş qrupunda olan insanlardır. Vətəndaşlar bu cür hallarda DİN-nin 102 qaynar xəttinə müraciət edə bilərlər.
