Bakı-Quba-Rusiya yolundan xüsusi kartla istifadə etmək mümkün olacaq. Bu haqda bu gün, 21 oktyabr tarixində Bakuplus.az Report-a istinadən xəbər verir.
Kartlar 2 formada olacaq. Belə ki, yoldan daima istifadə edən sürücülər daimi kart, vaxtaşırı istifadə edənlər isə birdəfəlik kart əldə edəcəklər. Ödənişli yol sistemi sürücülərə adi və dayanmadan keçid zolaqlarından istifadə etmək imkanı verəcək. Adi zolağa daxil olan sürücü ödəniş məntəqələrində keçid üçün kartı əldə edərək avtomobilin ön şüşəsinə yerləşdirir və daha sonra ödənişli yoldan istifadə etmək hüququna sahib olur.
Dayanmadan keçid zolağı isə sürücülərə ödəniş məntəqələrində sürəti azaltmadan və dayanmadan keçməyə imkan verir. Bunun üçün sürücüdə əvvəlcədən əldə edilmiş xüsusi çip kart və yetərli ödəniş balansının olması kifayətdir
Bu zolaqlarda kameralar, avtomobilləri klassifikasiya etməyə imkan verən avadanlıqlar tətbiq olunub. Bütün məntəqələrdə çəkiyə nəzarət və yolun dayanıqlığını təmin etmək məqsədilə elektron tərəzi sistemi də quraşdırılıb. Gələcəkdə avtomatik ödənişlər və ya QR-kodlarla mobil ödənişlər də mümkün olacaq.
Ötən gün Prezident İlham Əiyevin iştirakı ilə sözügedən yolun açılış mərasimi baş tutub.
