Ötən gün, 25 iyul tarixindən etibarən Bakıda küçə parklanması ödənişli olub. Bakı şəhəri üzrə 5 parklanma zonası müəyyən edilib və ödənişlər hər zonaya uyğun tətbiq edilir. Bu haqda bu gün, iyulun 26-da Bakuplus.az Azərbaycan Yerüstü Nəqliyyat Agentliyinə istinadən məlumat verir.
Zonalar Mərkəz, I, II, III və IV kimi müəyyən olunub. IV zonaya daxil edilən ərazilərdə parklanma ödənişsizdir. Həmçinin digər zonalarda nəqliyyat vasitələrinin parklanması üçün saat 22:00-dan saat 07:00-dək, eləcə də həftənin bazar günləri ödəniş tələb olunmur.
Təşkil edilmiş parklanma yerindən hər iki istiqamətdə yolun hər iki kənarı boyu 100 metr məsafədə yerləşən ev və ya binalarda yaşayan sakinlər də müraciət edərək fərdi parklanma talonları ala və həmin parklanma yerlərindən ödənişsiz istifadə edə bilərlər.
Hazırda şəhərdə mərhələli şəkildə müvafiq nişanlanma və terminallar quraşdırılır. Ödənişlər nağdsız formada mobil tətbiq, SMS və ödəmə terminalı vasitəsilə həyata keçiriləcək. Mobil tətbiq artıq hazırdır və yaxın günlərdə sakinlərə təqdim olunacaq.
Yeni qaydalar tətbiq olunana qədər küçə parklanma yerlərindən istifadə ödənişsizdir.
Parklanma yerlərində müəyyən olunmuş parklanma qaydalarına riayət olunması, ödəmələrin həyata keçirilməsinə nəzarət məqsədilə nəzarətçilər, eləcə də “Nəqliyyat Könüllüləri” prosesə cəlb olunacaqlar.
