Dövlət qurumlarını aldadan iş adamına hökm oxunub. Bu haqda bu gün, 20 aprel tarixində Bakuplus.az Qafqazinfo-ya istinadən xəbər verir.
Bakı Ağır Cinayətlər Məhkəməsinin qərarına əsasən, “Bina Tikinti Kompaniyası” MMC-nin rəhbəri Üzeyir Həsənov 11 il müddətinə azadlıqdan məhrum edilib, onun 10 milyonluq əmlakı dövlət nəfinə müsadirə edilib.
Təqsirli bilinən şəxs Müdafiə Nazirliyinin silah-sursat anbarının tikintisinə ayrılan 7 milyon AZN pulu mənimsəməkdə ittiham olunur. O, 2011-2017-ci illərdə silah-sursat anbarının tikintisi, orada kommunikasiya xətlərinin, mebellərin quraşdırılması zamanı öhdəliklərini tam şəkildə yerinə yetirməyərək qiymətləri şişirdib.
Bundan əlavə, Əmlak Məsələləri Dövlət Xidmətinin sifarişi əsasında Azərbaycan Tarix Muzeyinin ekspozisiyasının təmir-bərpa işlərinin aparılmasını öz üzərinə götürən şirkət rəhbəri burada da öhdəliyini yerinə yetirməyib və 1,8 milyon AZN pulu mənimsəyib.
