Audiovizual Şura “Daxili TV” anteni ilə yayımlanan kanallarda yaranan problemlərə aydınlıq gətirib. Bu haqda bu gün, 8 iyun tarixində Bakuplus.az Report-a istinadən xəbər verir.
Audiovizual Şura bəzi vətəndaşların “Daxili TV” anteni ilə birbaşa Bakı Teleqüllə Kompleksindən yayımlanan kanalların izlənməsində yaşadıqları çətinliklərlə bağlı müraciətlərinə aydınlıq gətirib.
Bildirilib ki, Bakı şəhəri və Abşeron yarımadası ərazisinin çox hissəsində Bakı Teleqüllə Kompleksindən 85-95 km məsafədə təmiz siqnal var.
“Lakin Bakı şəhəri və Abşeron yarımadasının bəzi yerlərində relyefin nahamar olması, yeni hündürmərtəbəli binaların inşası səbəbindən düz radiogörmə təmin olunmur və ya müxtəlif böyük ölçülü maneələr olduğu təqdirdə yerüstü televiziya yayımının aparıldığı desimetrlik dalğalar bu maneələri aşa bilmir və ona görə də qəbul şərtləri pozulmuş olur”, – deyə şuradan qeyd edilib.
Audiovizual Şura sözügedən problemlə qarşılaşan vətəndaşlara bu barədə qurumu məlumatlandırmağı tövsiyə edib.
