Dendrologiya bağında yenidənqurma işləri davam edir. Bu haqda bu gün, 22 avqust tarixində Bakuplus.az AzTV-yə istinadən xəbər verir.
Təmir-tikinti işləri çərçivəsində qəzalı vəziyyətdə olan nəzarət buraxılış məntəqəsi bərpa olunub. Ərazidə dairəvi və dördbucaqlı su hovuzları, işçilər üçün yeni inzibati bina inşa olunacaq.
Həmçinin 12 hektar ərazisi olan bağ üçün 700-ə yaxın yeni bitki növləri gətirilib, onların qorunması üçün bağın ərazisində ümumi sahəsi 60 kv.m olan 3 ədəd istixana yaradılacaq. Daha sonra onların qarşısında dekorativ fontan quraşdırılacaq.
Bağın bir vaxtlar sahibi olan xeyriyyəçi Murtuza Muxtarovun ev-muzeyinin təmir-bərpa edilməsi planlaşdırılır. Şair Serqey Yeseninin ev-muzeyinin bünövrəsinin möhkəmləndirilməsi nəzərdə tutulur. Həmçinin ərazidə özünəməxsus üslubu ilə seçilən su hövzələri də təmir olunacaq.
Bundan əlavə, ərazidə piyada yollarının çəkilməsi, uşaq əyləncə meydançalarının salınması nəzərdə tutulub. Təmir işlərinin 2024-cü ilin aprel-may aylarında aparılması planlaşdırılıb.
