Bakı Ağır Cinayətlər Məhkəməsində qəsdən adam öldürməkdə təqsirləndirilən İqor Lısenkonun cinayət işi üzrə növbəti məhkəmə iclası keçirilib.
Təqsirləndirilən İqor Lısenko ifadəsində bildirib ki, öldürülən İlqar Məmmədov içki aludəçisi olub, tez-tez ondan pul istəyib, verməyəndə isə dava salıb. Onun sözlərinə görə, İlqar bir müddət onların evində qalıb, sərxoş vəziyyətdə dəfələrlə onu döyüb, maaşını oğurlayıb və getdikcə daha çox pul tələb edib.
İ.Lısenko əlavə edib ki, İlqar bir qadını ölümcül döydüyünü gördükdən sonra ondan qorxmağa başlayıb. Bildirib ki, İlqar onu hədələyərək "məni satsan, həm səni, həm də ananı öldürəcəyəm" deyib və avtomobilini icarəyə verməyə məcbur etməyə çalışıb.
Onun sözlərinə görə, hadisə günü İlqar onu görüşə çağırıb, zorla spirtli içki içirdib. Daha sonra telefonunu itirməkdə günahlandıraraq yenidən ona hücum edib. İ.Lısenko isə artıq dözə bilmədiyini bildirərək avtomobildən bıçağı götürüb İlqar Məmmədova ardıcıl zərbələr endirib.
Daha sonra dindirilən qonşu şahid də İlqar Məmmədovun kobud, aqressiv və içki düşkünü olduğunu, İqora tez-tez zorakılıq göstərdiyini təsdiqləyib.
Növbəti məhkəmə prosesi 5 avqusta təyin edilib.
Xatırladaq ki, hadisə 21 fevral 2026-cı ildə Xəzər rayonu, Şüvəlan qəsəbəsində baş verib. İqor Lısenko dostu İlqar Məmmədovu avtomobildə bıçaqlayaraq qətlə yetirməkdə təqsirləndirilir.
mənbə lent.az
