Bakıda süni tıxacların aradan qaldırılması istiqamətində işlərə başlanıb. Bu haqda 20 oktyabr tarixində Report Bakı Şəhər Dövlət Yol Polisinin mətbuat xidmətinə istinadən xəbər verib.
Bakı Şəhər Dövlət Yol Polisinin baş inspektoru, polis mayoru Araz Əsgərli paytaxt yollarında ənənəvi xarakter almış problemlər barədə söz açıb.
O bildirib ki, vətəndaşların haqlı narazılıq və narahatlığının aradan qaldırılması, süni sıxlıqların yaşanmaması üçün yol polisi gücləndirilmiş qaydada tədbirlərə başlayıb: “Dəfələrlə paytaxt yollarının, piyada səkilərinin, yolların hərəkət istiqamətlərini zəbt olunması məsələsini vurğulasaq da, təəssüflər olsun ki, hələ də yolların hərəkət hissəsində, piyada səkilərində eyni növ problemlər gündəlik təkrarlanır. Yol polisi yenidən gücləndirilmiş tədbirlərə keçib və bu proses davam edəcək”.
Araz Əsgərli sürücülər tərəfindən qaydalara riayət olunmadığı təqdirdə daha qətiyyətli şəkildə mübarizə aparılacağını qeyd edib.
