Xəbər verdiyimiz kimi, əmək müqavilələri mərhələli şəkildə elektron formaya keçirilir. Baş nazir Əli Əsədov sözügedən mərhələlərin müəyyən edilməsi ilə bağlı qərar imzalayıb.
Bəs, görəsən bu qərarın işçilərə nə kimi xeyiri olacaq?
Məsələ ilə bağlı Sumqayıt24-ə danışan hüquqşünas Əkrəm Həsənov bildirib ki, elektron müqavilələrin bir sıra üstünlükləri var:
“Azərbaycanda işəgötürənlərin əksəriyyəti işçiləri əmək müqaviləsi bağlamadan işlədir. Son illərdə bu sahədə xeyli dəyişikliklər olsa da, günümüzdə yenə də belə hallarla qarşılaşa bilirik.
Məsələn, sabah Dövlət Əmək Müfəttişliyi Xidməti hər-hansı işçinin müqaviləsiz işlədiyini aşkarlasa, işəgötürən cərimələnməmək üçün yalandan “müqavilə var”, yaxud “bu gün, ya da dünən bağlamışıq” deyə bilməyəcək.
Elektron əmək müqaviləsinin də əsas üstünlüyü məhz budur – belə işəgötürənləri qorxutmaq. Çünkü işçilər işini itirməkdən qorxduqları üçün gedib şikayət etmirlər və qeyri-rəsmi işləməyə məcbur olurlar.
Müqaviləsiz işləmək isə işçinin ziyanınadır. Çünki bu zaman onun məzuniyyət hüququ təmin olunmur, istənilən vaxt işinə xitam verilir, gəlirindən vergi ödənilmir, sosial müdafiə ödənişləri həyata keçirilmir, yəni pensiya fondu formalaşmır”.
