“Əgər Artsaxdan olan soydaşlarımızın getməli olduğu bir vəziyyət yaranarsa, Ermənistan, təbii ki, onları qəbul etməyə hazırdır və qəbul edəcək”, – bunu Nyu-Yorkda keçirilmiş BMT Təhlükəsizlik Şurasının iclasında Ermənistan Təhlükəsizlik Şurasının katibi Armen Qriqoryan deyib.
Qarabağdakı separatçı anklavın sakinlərinə biganəlik ittihamlarına cavab olaraq Qriqoryan qeyd edib: “Ermənistan Baş Qərargah rəisinin ailəsi indi Artsaxdadır, anam hazırda Artsaxdadır”.
“Müttəfiqimiz Rusiyanın 2020-2022-ci illərdə bizə kömək etmək imkanı var idi, lakin kömək etmədi”, – deyə Qriqoryan bildirib. O əlavə edib ki, onlar “Hindistan kimi, digər tərəfdaşlar tapmaqla” ordunu gücləndirə bilərlər.
BMT-nin iclasının gərgin ab-havada keçdiyi bildirilir. Həmçinin məlum olub ki, Ermənistanın XİN rəhbəri Ararat Mirzoyan azərbaycanlı həmkarı Ceyhun Bayramovun çıxışı zamanı iclas zalını tərk edib.
