7 may görkəmli rəssam Əzim Əzimzadənin doğum günüdür.
Əzim Əzimzadə 1880-cı ilin may ayında Novxanıda kasıb ailədə doğulub. İlk təhsilini Novxanıdakı molla məktəbində alıb. Boyalarla ilkin tanışlığı burda olub. O, ailəsinin etirazlarına baxmayaraq rus-tatar məktəbində təhsil alıb. Məktəbi bitirdikdən sonra metaltökmə zavodunda işləməyə başlayıb.
Rəssamlıqda ilk addımlarını əsərlərini məşhur “Molla Nəsrəddin” jurnalında dərc etdirməklə atıb.
Onun satirik qrafik karikaturaları 1906-cı ildən “Molla Nəsrəddin”, “Baraban”, “Zənbur”, “Tuti”, “Kəlniyyət” və sair jurnallarda çap olunub, bununla da o, Azərbaycan satirik qrafikasının əsasını qoyub.
Yaradıcılığında Təbriz Azərbaycan miniatür məktəbinin və rus rəssamlıq məktəb ənənələrinin izlərini görmək mümkündür.
Əzim Əzimzadənin əsərlərinin əsas mövzusunu sosial təzadlar, adətlər və xalqın məişət həyatı təşkil edirdi.
Ə. Əzimzadə satirik şair M.Ə.Sabirin "Hophopnamə"sinə çəkdiyi illüstrasiyalarla (1914) kitab qrafikası sənətinin də əsasını qoyub. Onun teatrlara çəkdiyi geyim eskizləri və dekorasiyalar Azərbaycan rəssamlığının bu sahədəki inkişafına xüsusi təkan verib. Əsərləri dünyanın bir sıra muzeylərində nümayiş etdirilən rəssamın ilk fərdi sərgisi 1940-cı ildə təşkil olunub. 1920–1943-cü illərdə Ə. Əzimzadə Azərbaycan Rəssamlıq Texnikumunda müəllim, 1932–1937-ci illərdə isə direktor olub.
Əzim Aslan oğlu Əzimzadə 1943-cü il may ayının 15-də Bakıda vəfat edib.
Bakı Rəssamlıq Texnikumu, eləcə də Bakı küçələrindən biri onun adını daşıyır. Yaşadığı evdə rəssamın ev muzeyi açılıb, evin yaxınlılığındakı bağda büstü qoyulub.
Azərbaycan Respublikası Nazirlər Kabinetinin 7 may 2019-cu il tarixli, 211 nömrəli Qərarı ilə Əzim Əzimzadə Azərbaycan Respublikasında əsərləri dövlət varidatı elan edilən müəlliflərin siyahısına daxil edilib.
2022-ci ildə Bakıda Əzim Əzimzadəyə həsr olunan Bakı Dizayn Festivalı keçirilib.
