Bakıda QGallery qalereyasında rəssam Cəmil Hüseynovun "Fantazm" adlı ikinci fərdi sərgisi açılıb.
Bakuplus.az xəbər verir ki, aprelin 23-də fəaliyyətə başlayan sərgi 28 aprel tarixinədək ziyarətçilər üçün açıq olacaq.
"Fantazm" adı rəssamın yaradıcılığındakı sürrealist xətti və cəsarətli bədii ifadəni özündə cəmləyir. Ekspozisiyada təqdim olunan əsərlərdə fantasmaqorik obrazlar vasitəsilə reallıq və təxəyyül arasında incə, bəzən isə qəsdən pozulan sərhədlər hiss olunur.
Qeyd edək ki, Cəmil Hüseynov 24 dekabr 1987-ci ildə anadan olub. İnteryer dizaynı üzrə bakalavr təhsilini başa vurduqdan sonra o, sənətin beşiyi sayılan Florensiya şəhərində yerləşən "Charles H. Cecil Studios" studiyasında təhsilini davam etdirib. Burada klassik incəsənətin dərinliklərinə yiyələnən rəssam, eyni zamanda böyük ustaların yaradıcılıq ruhunu mənimsəyib.
Dörd illik təhsilini tamamladıqdan sonra Bakıya qayıdan rəssam fəaliyyətini davam etdirərək 2016-cı ildə məhz "QGallery" qalereyasında ilk fərdi sərgisini təqdim edib.
Sonrakı illərdə onun yaradıcılığı XIX–XX əsr simvolizm və realizm cərəyanlarının təsiri ilə transformasiya olunaraq yeni mərhələyə qədəm qoyub. Bu təsirlər nəticəsində rəssamın işlərində müəyyən metamorfozlar baş verib və apardığı eksperimentlər onu özü üçün belə yeni olan fərqli bir bədii istiqamətə gətirib çıxarıb.
2025-ci ildə Cəmil Hüseynov Heydər Əliyev Fondu tərəfindən Heydər Əliyev Mərkəzində təşkil olunan "My seas, my oceans" sərgisində iştirak edib. Elə həmin il o, beynəlxalq miqyasda tanınan "Almenara Art Prize" müsabiqəsinin qaliblərindən biri seçilib.
