4 iyun görkəmli müğənni Fatma Mehrəliyevanın doğum günüdür.
O, 1926-cı ildə Qubada anadan olub. Orta məktəbdə nəğmə dərslərində xüsusi fəallıq göstərdiyinə görə, müəllimlərinin təkidi ilə Bakı musiqi festivalında iştirak etmək üçün paytaxta gedib, festivalda "Qubanın ağ alması" xalq mahnısını ifa edib. On bir yaşlı Fatmanın ifası dahi bəstəkar Üzeyir Hacıbəyovun diqqətini cəlb edib. Bəstəkar Fatma Mehrəliyevanı himayəsinə götürərək yaxşı təhsil alması üçün hər cür şərait yaradıb. Fatma Mehrəliyeva 1938-ci ildə Üzeyir Hacıbəyovun təşəbbüsü ilə Bakıya gəlib.
O, 1940-cı ildə Azərbaycan Dövlət Filarmoniyası nəzdindəki "Sazçı qızlar" ansamblında əmək fəaliyyətinə başlayıb. Elə həmin ildə Azərbaycan Dövlət Filarmoniyasının solisti olub və geniş konsert proqramları ilə çıxış edib.
Fatma Mehrəliyeva muğam, xalq mahnı və təsniflərinin, eləcə də bəstəkar mahnılarının mahir ifaçısı kimi şöhrət qazanıb. Elə bu şöhrət sayəsində lirik soprano səsə malik olan müğənni 1945-ci ildə Üzeyir Hacıbəyovun eyniadlı operettası əsasında çəkilən "Arşın mal alan" filmində Telli roluna çəkilib.
Azərbaycan musiqi sənətindəki xidmətlərinə görə 1956-cı ildə respublikanın Əməkdar artisti adına layiq görülüb.
