Millət vəkili Fazil Mustafa silahlı hücumdan sonra ilk dəfə media qarşısına çıxıb. Bu haqda bu gün, 7 aprel tarixində Bakuplus.az Real TV-yə istinadən xəbər verir.
Milli Məclisin deputatı hücumun olduğu gün barəsində danışıb. O, hadisənin restorandan çıxıb evə gəldiyi zaman baş verdiyini bildirib:
“Evə yaxınlaşarkən heç bir şübhəli məqam hiss etmədim. Qapını pultla açdım, bu vaxt telefonu əlimə götürəndə dəhşətli parıltı gördüm. Bunun silah olduğunu düşünmədim, elə bildim telefonum partladı. Deməli, güllə maşının qapısından keçib ayağıma dəyib. Birdən başa düşdüm ki, mənə atəş açırlar. Maşının qapısını açıb əyilərək evə doğru qaçdım. Yoldaşım qapını açanda dedim ki, məni vurdular, qapını bağlayın. Gözüm kamerada idi ki, görüm onlar mənim arxamca gələcəklər, yoxsa yox. Yoldaşım pultu tapıb darvazanı bağladı. Özüm 102-yə zəng etdim ki, mən filankəsəm, mənə qarşı sui-qəsd olub.
Sonra mülki geyimdə polislər gəldi. Ondan sonra hər tərəfə məlumat verildi”.
Fazil Mustafa xəstəxanaya gedənə qədər özündə olduğunu qeyd edib. Həyətdə kamera olsa da, hücum edən şəxs əlverişsiz, ancaq kameranın düşmədiyi yerdə gizlənibmiş. Hücumçular 8 güllə atıblar.
28 mart tarixində deputat Fazil Mustafaya silahlı hücum olub. O, ayağından və çiynindən yaralanıb.
