“Azərbaycan Hava Yolları” QSC (AZAL) fevral ayından Bakı ilə Aktau arasında uçuşları bərpa edəcək. Bu haqda şərkətin mətbuat xidməti bu gün, 1 fevral tarixində məlumat verib.
Uçuşlar fevralın 18-də başlayacaq və həftədə üç dəfə - çərşənbə axşamı, cümə və bazar günləri həyata keçiriləcək.
Reyslərə yalnız COVID-19 pandemiyası səbəbindən tətbiq edilən məhdudiyyətlər şəraitində uçuş icazəsi olan sərnişinlər kateqoriyası qəbul olunacaq.
Pandemiya zamanı ölkəyə giriş qaydaları ilə aviaşirkətin saytında bu keçiddə tanış olmaq olar: https://www.azal.az/az/information/covid-kazakhstan.
Azərbaycana giriş qaydaları ilə bağlı məlumatı https://www.azal.az/ru/information/covid-azerbaijan saytından əldə etmək mümkündür. Aktaudan Bakıya uçarkən sərnişinlərin COVID-19 testindən keçməsi mütləqdir.
PCR testinin mənfi olduğunu əks etdirən sənədin QR-kodunun olması arzu edilir. Bu, hava limanında rəsmi prosedurları sürətləndirməyə kömək edəcək. Sərnişinlər COVİD-19 testinin nəticəsinin uçuşdan 72 saat əvvəl etibarlı olmasını təmin etməlidirlər.
