Fövqəladə Hallar Nazirliyi “Xəngəland” kafesinin fəaliyyətini dayandırıb. Bu haqda BakuPlus.az qurumun mətbuat xidmətinə istinadən bu gün, 4 noyabr tarixində xəbər verir.
FHN-in Dövlət Yanğın Nəzarəti Xidməti Səbail rayonu, Mehdi Hüseyn küçəsi, ev 88, mənzil 5 ünvanında yerləşən Əhmədov Sabir Faiq oğluna məxsus “Xəngəland” kafesində yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edib.
Sözügedən obyektə yük avtomobilindən propan qaz balonlarının daşınması haqqında daxil olmuş əməliyyat məlumatı və sakinlərin müraciətləri əsasında obyektdə yoxlama aparılıb.
Nəticədə:
- obyektin yerləşdiyi mərtəbədə binanın ümumi istifadəsində olan, insanların təhlükəsiz təxliyəsi üçün nəzərdə tutulmuş dəhliz hissəsindən mətbəx otağına qanunsuz qaz xəttinin çəkildiyi və propan qaz balonlarının rezin boru vasitəsilə həmin xəttə birləşdirilərək yanğın təhlükəsizliyi və tikinti norma və qaydalarının tələblərinin kobud şəkildə pozulduğu;
- obyektin otaqlarında avtomatik yanğın xəbərdaredici qurğuların quraşdırılmadığı;
- insanların kütləvi toplaşdığı obyektdə ehtiyat təxliyə yolunun mövcud olmadığı;
- obyektin normaların tələblərinə uyğun sayda ilkin yanğınsöndürmə vasitələri ilə təmin edilmədiyi;
- elektrik təsərrüfatına profilaktik baxış keçirilmədiyi və elektrik naqillərinin izolyasiyasının gərginliyə qarşı müqavimətinin yoxlanılmadığı;
- tüstü bacalarının yağ qalıqları və digər yanar materiallardan təmizlənmədiyi;
- obyektin işçi heyətinin yanğın təhlükəsizliyi tədbirləri və yanğın zamanı davranış qaydaları haqqında təlimatlandırılmadığı aşkar olunub.
Sahibkar Sabir Əhmədova dəfələrlə xəbərdarlıq edilməsinə və barəsində inzibati tədbirlər görülməsinə baxmayaraq, obyektdə kobud qayda pozuntularına hələ də yol verilir.
Qeyd olunanlarla əlaqədar qanunvericiliyə uyğun olaraq, “Xəngəland” kafesində işlərin və xidmətlərin göstərilməsinin dayandırılması barədə Qərar qəbul olunub.
Eyni zamanda real təhlükə mənbəyi olan propan qaz balonlarının binadan kənarlaşdırılması təmin olunub.
[caption id="attachment_77715" align="alignnone" width="640"]
Foto FHN-in rəsmi saytı[/caption]
