Bakıda fiziki qüsurlu uşağın arzusu reallaşdırılıb. Bu haqda bu gün, 16 oktyabr tarixində Bakuplus.az Avtosfer.az-a istinadən xəbər verir.
6 yaşlı Ədalətin arzusu gələcəkdə həkim olmaqdır. “Yeni Klinika”nın dəstəyi nəticəsində azyaşlı bir günlük həkim olmaq hissini yaşaya bilib. Ədalət üçün klinika daxilində tur keçirilib. Eyni zamanda, klinikanın direktor müavini, Cərrahiyyə və transplantasiya mərkəzinin rəhbəri Eldar Əhmədovun da qəbulunda olub.
Bundan əlavə, TƏBİB-nin icraçı direktorunun müşaviri, “Yeni Klinika”nın idarə heyətinin üzvü Pərvin Əkbərov Ədalətin fizioterapiya və reabilitasiyası məqsədilə müvafiq prosedurlarının icra ediləcəyini də vurğulayıb.
Bir müddət öncə “Diqqət, uşaqlar!" adı altında hərəkətin təhlükəsizliyi aylığına həsr olunmuş tədbir zamanı fiziki qüsurlu ədalət polis əməkdaşının “Gələcəkdə nə işləmək istəyirsən?” sualına “həkim” deyə cavab vermişdi. Bu dialoq sosial şəbəkələrdə isti qarşılanmışdır.
