Bakıda 28-30 aprel tarixlərində keçiriləcək “Formula 1” üzrə Azərbaycan Qran-prisinin yarış həftəsində halqanın əhatə etdiyi bəzi yollar nəqliyyatın hərəkətinə açıq olacaq. Bu haqda bu gün, 16 mart tarixində Bakı Şəhər Halqası Əməliyyat Şirkətindən məlumat verilib.
Yarış zolağının Neftçilər prospektinin Azneft dairəsindən Dəniz Vağzalına qədər olan hissəsi və İstiqlaliyyət küçəsinin Şeyx Şamil küçəsindən Azərbaycan prospektinə qədər olan hissəsi aprelin 24-dən 29-dək müəyyən saatlarda əhalinin istifadəsi üçün açılacaq.
24-26 aprel tarixlərində səhər saatlarında 07:00-dan 09:00-dək, axşam saatlarında isə 18:00-dan 20:00-dək sözügedən yollarda nəqliyyatın hərəkəti dayanma və durma olmadan sərbəst olacaq.
Yollar yalnız hərəkət üçün istifadə ediləcək, dayanma və durma qadağan olunacaq.
