“Formula 1” Azərbaycan Qran-prisi günlərində Bakı Şəhər Halqası (BŞH) əməliyyat şirkəti avtomobillərin hərəkəti üçün marşrutun ayrı-ayrı hissələrini açacaq. Bu haqda bu gün, 25 aprel tarixində Report məlumat verib.
Aprelin 24-29-da yolun Neftçilər prospektində - Azneft meydanından Dəniz Vağzalına qədər olan hissə və İstiqlaliyyət küçəsinin Şeyx Şamil küçəsindən Azərbaycan prospektinə qədər olan hissə müəyyən saatlarda avtomobillərin birtərəfli hərəkəti üçün açıq olacaq.
Aprelin 24-dən 26-dək səhər saat 07:00-dan 09:00-dək, axşam saat 18:00-dan 20:00-dək sözügedən yollarda (Neftçilər prospektinin Azneft dairəsindən yalnız Dəniz Vağzalı istiqamətində olan hissəsi və İstiqlaliyyət küçəsinin Şeyx Şamil küçəsindən Azərbaycan prospektinə qədər olan hissəsi) ancaq birtərəfli olmaqla nəqliyyatın hərəkəti dayanma və durma olmadan sərbəst olacaq.
27 aprel tarixində Neftçilər prospektinin Azneft dairəsindən yalnız Dəniz Vağzalı istiqamətində olan hissəsi yalnız birtərəfli olmaqla səhər saatlarında 07:00-dan 09:00-dək, axşam saatlarında isə 20:00-dan 22:00-dək açıq olacaq. 28-29 aprel tarixlərində isə burada nəqliyyatın hərəkəti yalnız axşam saatlarında 20:00-dan 22:00-dək mümkün olacaq.
Göstərilən tarixlərdə şəhər sakinlərinin maneəsiz gediş-gəlişini təmin etmək üçün marşrutun hissələrində yeraltı keçidlər gün ərzində açıq olacaq. Piyadalar, həmçinin Azərbaycan prospekti ilə İstiqlaliyyət küçəsinin kəsişməsində, Xəqani və Rəşid Behbudov küçələrində, həmçinin trekin yaxınlığında, Azadlıq prospekti və Xəqani küçələrində quraşdırılmış müvəqqəti yerüstü keçidlərdən də istifadə edə biləcəklər. Rəşid Behbudov küçəsi ilə Neftçilər prospektinin kəsişməsində yerləşən yüksək keçid fasiləsiz işləyir.
Bu küçələrdə avtonəqliyyat vasitələrinin hərəkəti mayın 2-də saat 08:00-dan etibarən tam bərpa olunacaq.
Azərbaycan Qran-prisi 28-30 aprel tarixlərində keçiriləcək.
