“Formula 1” zamanı bəzi yollar əhali üçün açılacaq.
Bakı Şəhər Halqası xəbər verir ki, yarış zolağının giriş və çıxış hissələri bazar ertəsi, 9 sentyabrdan cümə axşamı 12 sentaybr tarixinə qədər müəyyən saatlarda nəqliyyatın hərəkətinə açıq olacaq.
Giriş nöqtələri:
- Salyan şosesindən Neftçilər prospekti və Azneft dairəsi istiqamətində.
- M.Lermontov küçəsindən BMT-nin 50 İlliyi küçəsi və İstiqlaliyyət küçəsi istiqamətində.
- S.Vurğun küçəsindən Ü.Hacıbəyli küçəsi və Bülbül prospekti istiqamətində.
- Bülbül prospektindən Xəqani küçəsi və Neftçilər prospekti istiqamətində.
- Nizami və Puşkin küçələrinin kəsişməsindən Xəqani küçəsi istiqamətində.
Çıxış nöqtələri:
- Neftçilər prospektindən Bakı Dəniz Limanı, Port Baku Mall və Crescent Mall istiqamətində.
- İstiqlaliyyət küçəsindən Azərbaycan prospekti istiqamətində.
- Neftçilər prospektindən Azneft dairəsi, Dəniz Mall və Salyan şosesi istiqamətində.
9, 10, 11 sentyabr tarixlərində, səhər saat 07:00-dan 09:00-dək, axşam saat 18:00-dan 20:00-dək yuxarıda qeyd olunan yollarda nəqliyyatın hərəkəti dayanma və durma olmadan sərbəst olacaq.
12 sentyabr tarixində isə sözügedən yollar səhər saat 07:00-dan 09:00-dək, axşam isə saat 20:00-dan 22:00-dək açıq olacaq.
Fövqəladə hallar istisna olmaqla, tranzit dəhlizləri açıq olduğu zaman, nəqliyyat vasitələrinin parklaması, sərnişin minmə və enməsi qadağandır. Bundan başqa, həmin yollarda ağır tonnajlı yük maşınlarının və ictimai nəqliyyatın hərəkəti istisna edilir. Sözügedən yollarda sürət həddi 50 km/saat olaraq müəyyən edilib.
Azərbaycan Qran-prisi sentyabrın 13-15-i aralığında təşkil olunacaq.
