Bir neçə gün əvvəl Bakıya yağan güclü yağış bitsə də, fəsadları hələ də qalmaqdadır.
Xezerxeber.az xəbər verir ki, Binəqədi rayonunda sakinlər günlərdir çarəsiz qaldıqlarını bildirirlər. Rəsulzadə-Binəqədi şossesinin kənarında, xüsusilə döngə 3 adlanan massivdə insanlar su əlindən evlərinə girməkdə çətinlik çəkirlər.
Sakinlər günlərdir çarəsizcə aidiyyəti qurumların köməyini gözləyirlər.
Məsələ ilə bağlı əvvəlcə Fövqəladə Hallar Nazirliyindən bildiriblər ki, sakinlər məsələnin həlli üçün aidiyəti üzrə rayon icra hakimiyyətindəki Fövqəladə Hallar Komissiyasına müraciət etməlidirlər.
Binəqədi rayon İcra Hakimiyyətindən isə cavab olaraq deyildi ki, həmin problemin həlli ilə bağlı icra hakimiyyəti aidiyyəti qurumlara müraciət edib.
Dövlət Su Ehtiyatları Agentliyindən bildirildi ki, Binəqədi rayon Sukanal İdarəsinin qəza briqadası qeyd olunan əraziyə göndərilib. Tullantı sularının yaşayış məntəqəsindən kənarlaşdırılması üçün işlər görülür.
