Gədəbəy rayonunda törədilmiş təxribatın iddia olunan əsas təşkilatçılarından birinin - Afiq Allahverdiyevin səs yazısı sosial şəbəkələrdə yayılıb. Bu haqda Bakuplus.az 23 iyun tarixində Oxu.az-a istinadən məlumat verir.
Səs yazısından aydın şəkildə anlamaq olur ki, Söyüdlü kəndində baş verən etirazlar əvvəlcədən təşkil edilib. Dinc sakinlərin manipulyasiya edilərək, planlı şəkildə təxribat törədilən əraziyə getməsinə çağırışlar edilir.
Rusiyada yaşadığı deyilən Afiq bu əməli bir müddət əvvəl planlaşdırıb. Bu işdə ona müəyyən köməkliyi isə Etibar Cabbarov və Dadaş Şirinov adlı şəxslər ediblər.
Kənd sakinlərini yaratdıqları “WhatsApp” qrupuna Afiq Allahverdiyevin atdığı səslərdən birində o deyir:
“Onlar ora necə hazırlıqlı çıxmışdılar, biz də elə çıxmalıyıq. Ora rahat çıxmaq üçün əvvəlcə başqa işləri görmək lazım idi. Mən yuxudan oyananda gördüm ki, hamı oradadır, millətin yarısının isə heç xəbəri yoxdur. Çıxan adamların da sayı 100-200 nəfər olub. Qalanların xəbəri yoxdur, siz onlara fikir verməyin. Əgər istəmirsinizsə, sabah onlara salam verməyin. Amma indi bunun vaxtı deyil, onu gələcəkdə edərsiniz. O gəlməyənlərin adını bir-bir çəkmək lazımdır. Demək lazımdır ki, bunlar, bunlar, etiraz etdilər, sizinlə birlikdə irəli çıxmadılar. Kimdən soruşursan, deyir oğlum, qızım orada işləyir.
Ay qardaş, orda Söyüdlü kəndindən cəmi 60 nəfər adam işləyir. Bu 4-5 min əhalinin yanında 60 nəfər nə deməkdir? Qoy onların 100 nəfəri orada işləsin, 100 nəfərin də qohumu orada işləmiş olsun, 500 nəfəri xəstə olsun. Bəs bunların qalanı hanı? Çayxanada oturub domino oynayanların adını çəkmək lazımdır ki, filankəslər irəli çıxmadı. Yoxsa Moskvada oturan yoldaşlar heç nə etmədi demək lazım deyil. Moskvada oturanlar neyləsinlər?”
Bununla yanaşı, o, aksiyadan çəkilmiş görüntülərin sosial şəbəkələrdə geniş yayılmasını da təmin edib. Aşağıda Afiq Allahverdiyevin “WhatsApp” qrupu vasitəsilə sakinlərə göndərdiyi səs yazısını dinləyə bilərsiniz:
İyunun 20-də Gədəbəy rayonunun Söyüdlü kəndi ərazisində sakinlər fəaliyyət göstərən süni gölün ətrafa zəhərli maddə buraxdığını iddia edərək etiraz ediblər. Bu zaman vətəndaşlarla polislər arasında insident yaşanmışdır.
