Marşrut məlumatları Google Maps-a geri qayıdacaq. Bu haqda 20 iyun tarixində Bizim.media məlumat verib.
Bu il mayın 10-dan “Google maps” qlobal naviqasiya resursunda Bakıda fəaliyyət göstərən marşrut xətlərinin istiqaməti haqqında xəritədə məlumatlar yığışdırılmışdır. Bununla da Bakı sakinləri və, əsas da, turistlər üz tutacaqları məntəqəyə hansı ictimai nəqliyyat vasitəsinin getdiyini bilməkdə problem yaşayırlar. Problemin aradan qaldırılması məqsədilə Bakı Nəqliyyat Agentliyi Google Maps-in nəqliyyat komandası ilə də danışıqlar aparıldığını bildirib.
“Google maps-in nəqliyyat komandası ilə, bildiyiniz kimi, müzakirələr gedirdi. Müntəzəm marşrut xətləri ilə bağlı zəruri olan məlumatlar bu müzakirələr çərçivəsində onlara təqdim olunub. Sadəcə Google maps-in məlumatların emal olunması proseduru var. Biz davamlı olaraq onlarla əlaqədəyik və, verilən məlumata görə, artıq proses yekunlaşmaq üzrədir”, - deyə BNA-nın sözçüsü Mais Ağayev qeyd edib.
