Bakı Ağır Cinayətlər Məhkəməsində iş yoldaşını bıçaqlamaqda təqsirləndirilən Nərmin Məmmədovanın (şərti) cinayət işi üzrə məhkəmə istintaqı yekunlaşıb. Bu haqda bu gün, 10 avqust tarixində Bakuplus.az Oxu.az-a istinadən məlumat verir.
Hakim Rahib Salmanovun sədrliyi ilə keçirilən prosesdə N.Məmmədovaya şərti cəza verilib.
Hadisə 2022-ci il iyulun 19-da, saat 05:30 radələrində Bakının Nizami rayonunda yerləşən evlərin birində qeydə alınıb. 18 yaşında olan Məmmədova onunla birlikdə kirayədə yaşadığı və “Tbilisi Pub” restoranında birgə işlədiyi Rahib Quliyevlə (şərti) mübahisə edib. Bu zaman zərərçəkmiş şəxs gənc qadını döyərək onun sağlamlığına yüngül dərəcəli bədən xəsarətləri yetirib. Daha sonra Nərmin yaşadığı otaqdan götürdüyü mətbəx bıçağı ilə Rahibin kürək nahiyəsindən qəsdən bir dəfə vuraraq iş yoldaşına xəsarət yetirib.
Faktla bağlı Azərbaycan Respublikası Cinayət Məcəlləsinin “Qəsdən sağlamlığa ağır zərər vurma” maddəsi ilə ittiham irəli sürülüb. İstintaq dövründə onun barəsində başqa yerə getməmək barədə iltizam növündə qətimkan tədbiri seçilib.
