Paytaxtda Gürcüstanın Müstəqillik Gününə həsr olunmuş tədbir baş tutub. Bu haqda bu gün, 25 may tarixində Bakuplus.az Report-a istinadən xəbər verir.
Heydər Əliyev Mərkəzində keçirilən tədbirdə Gürcüstan Milli Baletinin “Suxişvili” akademik truppası, “Rustavi” Gürcüstan xalq mahnı və rəqs akademik ansamblı və Azərbaycanın Əməkdar artisti Manana Caparidze konsert proqramı ilə çıxış ediblər.
Gürcüstanın Azərbaycandakı səfiri Zurab Pataradze Müstəqillik Gününün ölkəsi üçün əlamətdar günlərdən biri olduğunu qeyd edib.
“Strateji xarakter daşıyan hazırkı əlaqələr inkişaf etməkdə davam edir. Gürcüstan və Azərbaycanın həyata keçirdiyi Bakı–Tbilisi–Ceyhan, Bakı–Tbilisi–Ərzurum, TANAP və s. kimi iri regional layihələr regionda kommunikasiyaların və nəqliyyat əlaqələrinin inkişafında mühüm rol oynayır, həmçinin Avropa qitəsinin enerji təhlükəsizliyinin təmin edilməsinə töhfə verir”, - deyə səfir bildirib.
