“Mən onu bir dəfə yuxuda gördüm, yaşıl geyimdə idi...”
Xaliq adı, yaradan və quran mənasını daşıyır. 19 yaşı olmasına baxmayaraq, Xaliq Hüseynov 44 günlük Vətən Müharibəsində göstərdiyi cəsarət və qorxmazlıqla qəlblərdə əbədi taxt qurmağı bacardı. Düşmənə qarşı mərdliklə mübarizə aparan Xaliq, Vətən uğrunda canını fəda edərək şəhidlik zirvəsinə yüksəldi.
O, 2001-ci il sentyabrın 20-də Bakı şəhəri, Nardaran qəsəbəsində anadan olub. 295 saylı tam orta məktəbdə 9 illik təhsil alıb. Daha sonra təhsilini 13 saylı Bakı Peşə məktəbində davam etdirib. Eyni zamanda cüdo, kikboksinqlə məşğul olub.
Müharibə başlayanda Xaliq cəmi 9 ay idi ki, hərbi xidmətdə idi. Günaşırı valideynləri ilə danışır, hal-əhval tutur, onları nigaran qoymamaq üçün hər şeyin yolunda getdiyini deyir. Ta ki, oktyabrın 15-nə kimi...
Atası Kamil Hüseynov deyir ki, axırıncı danışıqları da elə həmin gün saat 4-də olub. Bundan sonra oğlunun səsini bir daha eşitməyib.
“Sənət öyrənirdi. Bir müddət usta yanında şagird kimi işlədi. Əsgərlik vaxtı çatanda isə dedi ki, gedirəm hərbi xidmətə, gələndən sonra davam edərəm. 2019-cu ildə hərbi xidmətə yola saldım. Müharibə başlayanda 9 ayın əsgəri idi. Oğlumla axırıncı dəfə oktyabrın 15-də saat 4-də danışmışıq. Biz zəng edib vəziyyətini soruşduq. Bilirdik müharibə gedir, bizdən gizlədirdi, heç nə demirdi. Həmişə mənimlə danışırdı. Anası ilə heç danışmırdı, bilirdi ki, nigaran qalacaq. Deyirdi anamdan və evdəkilərdən muğayat ol. Ayın 16-da mənə xəbər gəldi ki, oğlunuz Suqovuşan istiqamətində gedən döyüşlərdə şəhid olub. Həmişə deyirdi ki, hər şey yaxşı olacaq, torpaqları biz qorumasaq, kim qoruyacaq”.
Atası deyir ki, Xaliq uşaqlıqda çox nadinc və qorxmaz olub.
“Çox dəcəl idi. Qorxmayan uşaq idi. Heç nədən qorxmurdu. Pul qazanan uşaq idi, pulunun qədrini bilirdi. Həmişə imkansız şəxslərə əl tuturdu. İstəyirdi hamıya kömək eləsin”.
Atasının sözlərinə görə yuxuda oğlunu ağ atın üstündə görüb. Ona nigaran qalmamağı deyib:
“Tez-tez yuxuma gəlir. Amma mən onu bir dəfə yuxuda yaşıl geyimdə gördüm. Ağ rəngdə atın üstündə idi. Atın səsi gəlir və mən arxaya dönüb baxanda gördüm ki, Xaliq əlini qaldırıb və əlində yaşıl bayraq... İmam Hüseynin bayrağı. Dedi, ata, məndən nigaran qalma, yerim yaxşıdır. Anası da yuxuda görür, amma heç nə danışmır, kövrəlir. Həmişə deyirdi ki, kaş Qarabağ qayıdardı, biz də gedib o yerləri görərdik. Bu Allahın yazısıdır. Yazı pozulmaz heç vaxt. Müharibə də itkisiz olmaz. Vətən sağ olsun”.
Qeyd edək ki, Xaliq Hüseynov “Suqovuşanın azad olmasına görə”, “Cəsur döyüşçü” və “Vətən uğrunda” medalları ilə təltif olunub.
