15 sentyabr Azərbaycanın tanınmış müğənnisi İlqar Xəyalın doğum günüdür. O, 15 sentyabr 1966-cı ildə Bakıda anadan olub. O, 190 nömrəli orta məktəbdə təhsil alıb, daha sonra Azərbaycan Texniki Universitetini bitirib. Bununla yanaşı, tar üzrə musiqi təhsili də alıb.
İlqar Xəyal daha çox ötən əsrin 90-cı illərində, "Karvan" qrupunun solisti kimi tanınıb. 1988-ci ildə Sevinc Kərimovanın dəvəti ilə qrupa qoşulan sənətçinin "Karvan"dakı ilk mahnılarından biri "Sarı güllər" olub.
Sənətçinin repertuarında "Qara gözlər", "Qərib durnalar", "İlahə", "Mələyim", "Ərköyün qız", "Haradasan" və digər mahnılar xüsusi yer tutur. "Karvan" qrupundan sonra solo fəaliyyətini davam etdirən İlqar Xəyal müxtəlif illərdə televiziya aparıcısı kimi də fəaliyyət göstərib. O, "Çempionlar klubu" televiktorinasının aparıcısı olub.
İlqar Xəyal özünəməxsus səs tembri və ifa üslubu ilə Azərbaycan estrada musiqisində iz qoymuş sənətçilərdəndir.
