İnsult keçirən Xalq artisti Ənvər Həsənov komadadır.
Bu barədə Bakuplus.az-a aktyorun qızı Aytən Həsənova məlumat verib.
Bildirib ki, sənətkarın vəziyyəti gündən-günə pisləşir:
“Atamın beyni ölüb, amma ürəyi döyünür. Heç bir reaksiya yoxdur. Nə danışa, nə hərəkət edə, nə də yeyə bilir. Su belə içə bilmir. Buna baxmayaraq sistemləri vurulur, müalicəsi davam etdirilir. Lakin heç nə ona kömək etmir. Həkimlər deyir ki, son günləridir, qonağındır”.
Xatırladaq ki, Xalq artisti Ənvər Həsənov yanvarın 10-da halının pisləşməsi səbəbi ilə Xəzər Tibb Mərkəzinin Terapiya şöbəsinə hospitalizasiya olunub. Ona dəqiqləşdirilməmiş anemiya diaqnozu təyin edilib və ilkin zəruri tibbi xidmət göstərilib. Yanvarın 17-də vəziyyətinin ağırlaşması səbəbilə pasiyent Reanimasiya şöbəsinə köçürülüb. Aparılan diaqnostik müayinələr nəticəsində ona kəskin işemik insult diaqnozu təyin olunub. Yanvarın 18-də vəziyyəti stabilləşən Xalq artisti tibb müəssisəsinin Nevrologiya şöbəsinə köçürülüb. Fevralın 3-ü isə Xəzər Tibb Mərkəzindən Reabilitasiya Mərkəzindən evə buraxılıb.
Qeyd edək ki, Ənvər Həsənov Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın Əməkdar artisti, 1 avqust 2018-ci ildə isə Xalq artisti fəxri adlarına, 6 may 2023-cü ildə Azərbaycan mədəniyyətinin inkişafında xidmətlərinə görə Azərbaycan Respublikası Prezidentinin fərdi təqaüdünə layiq görülüb.
Ə.Həsənov “Yeddi oğul istərəm” filmində Cəlal, “Dərviş Parisi partladır” filmində Şahbaz, “Babək” filmində Tərxan, “Atları yəhərləyin” filmində Sirac, “Uşaqlığın son gecəsi” filmində Murad və başqa yaddaqalan obrazlar yaradıb.
Nəzrin Vahid
