Bu il intensiv yağışlar çox müşahidə olundu və bir çox yerlərdə sel hadisələri baş verdi. Belə hava şəraiti kənd təsərrüfatına həm müsbət, həm də mənfi təsirlər göstərə bilər.
Əgər yağışlar selə və torpağın yuyulmasına səbəb olursa, bu, kənd təsərrüfatına mənfi təsir göstərir. Amma yağış paylanması balanslı olarsa və torpaq suyu lazımi şəkildə sovura bilsə, bu, məhsuldarlıq üçün faydalı ola bilər.
Mövzu ilə bağlı Bakuplus.az-a açıqlama verən kənd təsərrüfatı üzrə ekspert Cəfər İbrahimlinin sözlərinə görə, son 5 il kənd təsərrüfatı üçün ən uğurlu dövr olub:
“Payız əkinindən sonra kifayət qədər yağış da, qar da yağıb. Havalar da iqlim normalarına uyğun keçib. Hazırda Aran rayonlarında yaz əkinləri aparılır. Bu şəkildə yağıntıların bitki üçün çox yaxşı hal olduğunu düşünürəm. Bitkiçilik sahələri üçün hazırda problem yoxdur. Ölkənin əksər ərazilərində taxıl bitkiləri əkilir ki, onlara da yağış su heç bir problem yaratmadı. Mayalanma dönəmi üçün problemli ola bilərdi. Lakin bu bitkilər mayalanma dönəminə girməyiblər.
Son iki-üç gündəki hava şəraiti bağçılıq təsərrüfatlarına ziyan verə bilər. Bu da əsasən daha çox Aran rayonlarında hiss olunur. Bəzi meyvə ağaclarının çiçəkləmə dövrü o vaxta təsadüf edirsə, onlara həm külək, həm də yağış bir qədər mənfi təsir edə bilər. Bunların xaricində hava şəraitinin kənd təsərrüfatı üçün ciddi fəsadlar yaradacağını düşünmürəm”.
İqtisadçı-ekspert Emin Qəribli isə qeyd edib ki, intensiv yağışların yağması meyvəçiliyə ciddi təsir edə bilər:
“Çünki bəzi ağaclar artıq gül açıb. Onlara mənfi təsir edə bilər. Lakin bəzi rayonlar var ki, havanın yağışlı keçməsinin müsbət təsiri mümkündür. İnetsiv yağışların hər il artdığını müşahidə edirik. Görürük ki, iqlim dəyişib. Yağış suyundan kənd təsərrüfatında çox yaxşı şəkildə istifadə edirlər. Suvarma sisteminin 50 faizi yağış sularının hesabına həyata keçirilir. Həm kənddə, həm də şəhərdə yağış suyunun istifadə olunmasına dair proqram tərtib olunsa, yaxşı olardı. Yağış suları müəyyən yerlərə toplansın, parkların suvarılmasında da istifadə edə bilərik. İqlim dəyişkliyindən istifadə etməliyik.
Yayda bizdə quraqlıq olur. Buna uyğun da adaptasiya aparılmalıdır. Hesab edirəm ki, bu barədə ciddi düşünməliyik”.
Nəzrin Vahid
