Son dövrlər, demək olar ki, tez-tez şəhərin bir çox yerlərində müxtəlif alətlərdə ifa edən musiqiçilərə rast gəlirik. Küçə musiqisi şəhərlərin canlılığını artıran, insanları bir araya gətirən və gündəlik həyatın bir parçası olan unikal bir mədəniyyətdir.
Küçə musiqisi bir sənətçinin öz istedadını və performansını göstərmək üçün kütləyə hesablanan çıxışın ən sadə üsuludur. Onlar həm də bu yolla qazanc əldə edirlər.
Elə ötən gün Bakının mərkəzi küçələrinin birində milli alətlərdə səsləndirilən musiqilər sanki ruhumu oxşadı. Yol aldım səs gələn tərəfə...
Sakitcə bir müddət həmin musiqiləri dinlədim. İşin yorğunluğundan sonra bu, insana sanki məlhəm kimi gəlir.
Gənc oğlan özünə istirahət verdiyi zaman yaxınlaşıb bir az söhbətləşdim. 18 yaşı var. Həm milli alətimizdə musiqilərimizi təbliğ edir, həm də tələbə kimi pul qazanır.
Bakuplus.az küçə musiqisi ilə məşğul olan İsrayıl Əhmədovla müsahibəni təqdim edir:
- İsrayıl bəy, ilk olaraq sizi tanıyaq.
- 2006-ci il avqustun 16-da Göyçay rayonunda anadan olmuşam. Bakıda təhsil alıram. Şuşa Humanitar Kollecinin III kurs tələbəsiyəm. Sonuncu ilimdir. Tarda instrumental ifaçılıq ixtisası üzrə oxuyuram.
- Musiqiyə marağınız necə yaranıb?
- Uşaq yaşlarımdan musiqiyə marağım var idi. Amma daha çox atam yön verdi. İlk olaraq atam bu sənətə getməyimi tövsiyə etdi. Onun özünün də musiqiyə həvəsi var. Nağarada ifanı bacarır. Lakin öz musiqi aləti yoxdur. Məndə musiqiyə maraq sonradan daha çox artdı. Göyçay musiqi məktəbində 5 il təhsil aldım.
- Bakının fərqli yerlərində ifa edirsiniz, yoxsa təkcə Nizami küçəsində?
- Hazırda Nizami küçəsində fəaliyyət göstərirəm. Sahilə gedən yolda yeraltı keçiddə də ifa etdiyim vaxtlar olub.
- Ətrafdakı sakinlərin sizə münasibəti necədir?
- Bu günə qədər heç kim narazılıq etməyib. Əksinə, hər zaman xoş sözlər eşidirəm. İnsanlar küçə musiqisini müsbət qarşılayırlar.
- Küçə musiqiçiləri üçün ictimai məkanlarda xüsusi yerlər ayrılmalıdır? Yoxsa öz istəyinizə uyğun məkan seçmək sizə daha uyğundur ?
- Xüsusi yerlər ayrıla da bilər. Hər birimiz özümüz üçün məkanlar seçsək daha gözəl olar. Xüsusən də izdihamlı yerlərdə olmalıdır.
- Bəs günlük qazancınız sizi təmin edir? Buradan başqa gəlir yeriniz var?
- Bu günümüzə şükürlər olsun. Başqa yerlərdən də gəlirim var. Bu işin sayəsində qazancım tələbə həyatı üçün normaldır. Lakin tələbə olmayan biri üçün çox çətin olar.
- Standart musiqiləri ifa edirsiniz, yoxsa sifariş edirlər?
- Əsasən standart, öz sevdiyim musiqiləri ifa edirəm. Bəzən sifarişlər də olur. Əgər bacaracağım ifadırsa, sifariş veriləni səsləndirirəm.
- Sizcə küçə musiqisi turistləri cəlb etmək üçün mükəmməl bir vasitə ola bilər?
- Bəli, turistləri cəlb etmək mümkündür. Milli alətimizlə daha çox turist cəlb etmək mümkündür. Onlar tarı çox sevirlər.
- Ailənizin küçədə musiqi ifa etməyinizə münasibəti necədir?
- Normal qarsalayırlar. Hər zaman dəstək olurlar.
- Küçə musiqisini ifa edənlərə nə demək istəyərdiniz?
- Hər birinə uğurlar arzulayıram. Ümid edirəm ki, daha böyük uğurlu işlərə imza atar, sənətdə irəli gedərlər.
[video width="300" height="500" mp4="https://bakuplus.az/storage/photos/2024/09/kjlklj.mp4"][/video]
