Azərbaycan vətəndaşları Laçına səfərə gedə biləcəklər. Bu haqda bu gün, 25 aprel tarixində Bakuplus.az Rəqəmsal İnkişaf və Nəqliyyat Nazirliyi və Dövlət Turizm Agentliyinə istinadən xəbər verir.
Belə ki, vətəndaşlar fərdi minik avtomobilləri ilə Şuşa şəhərinə və Suqovuşan qəsəbəsinə səfərlə bərabər, artıq Laçın şəhərinə də səfər edə biləcəklər. Səfər üçün icazəni “Yolumuz Qarabağa” portalı vasitəsilə əldə etmək mümkündür. Rəsmiləşdirilən icazələrin etibarlılıq müddəti 2 gün nəzərdə tutulub.
Laçın şəhərinə səfər Füzuli rayonunun Alxanlı keçid məntəqəsindən daxil olmaqla “Zəfər Yolu” və Horadiz qəsəbəsindən keçməklə Cəbrayıl – Zəngilan – Qubadlı – Laçın marşrutu ilə mümkün olacaq.
Səfər üçün 1 sürücü olmaqla avtomobildə maksimum 9 nəfərə icazə alına bilər. Maşınlar Azərbaycan Dövlət Qeydiyyat nişanına malik olmalıdır.
Səfərdən öncə portalda yerləşdirilmiş mehmanxana və digər yerləşmə məntəqələri ilə əlaqə saxlayıb, otaq sifarişlərini həyata keçirmək mümkündür.
İcazələri 26 aprel tarixindən etibarən almaq mümkündür. Səfərlər 27 aprel tarixindən başlayacaq.
