Daxili İşlər Nazirliyi Aşura günü ilə əlaqədar vətəndaşlara müraciət edir. Bu haqda bu gün, 22 iyul tarixində Bakuplus.az quruma istinadən xəbər verir.
Müraciətdə məhərrəmlik ayı ilə əlaqədar, eləcə də 28 iyul tarixində qeyd olunacaq Aşura günü ilə bağlı dini mərasimlərdə yetkinlik yaşına çatmayanların iştirakının tövsiyə olunmadığını nəzərə almaq xahiş olunur.
Bundan əlavə, hər bir şəxsin məscidlərə rahat gediş-gəlişi və dini ayinləri sərbəst, maneəsiz icra etməsi üçün polisin gördüyü işlərə dəstək verilməsi, eyni zamanda mərasim iştirakçılarının təhlükəsizliyinin, həmçinin yollarda nəqliyyatın hərəkətinin tənzimlənməsi üçün bütün lazımi tədbirlərin görüldüyü bildirilir.
“Hər bir şəxsin həyatının, sağlamlığının, hüquqlarının, qanuni mənafelərinin, bütövlükdə cəmiyyətin dinc həyatının qorunmasına xidmət edən bu müraciəti anlayışla qarşılamağa çağırır və qabaqcadan təşəkkürlərimizi çatdırırıq”, - deyə qurumdan bildirilib.
