Müəllimlərin etik davranışı ilə bağlı qaydalar dəyişib. Bu haqda bu gün, 23 may tarixində Bakuplus.az Oxu.az-a istinadən xəbər verir.
Elm və Təhsil Nazirliyinin Kollegiyasının qərarına əsasən, müəllimlərin vəzifələrini icra edərkən təhsil müəssisəsinin ərazisində siqaret çəkmələri qadağan edilib.
Təhsilverən korrupsiyaya imkan verməməli, təhsilalanları korrupsiyaya qarşı barışmazlıq ruhunda yetişdirməlidir. Təhsilverən xidməti vəzifəsinin qərəzsiz icrası ilə bağlı heç kimdən hər hansı formada hədiyyə, bəxşiş, ödəniş və s. tələb və ya qəbul etməməlidir. Bu qayda qonaqpərvərliklə bağlı və dəyəri qanunda nəzərdə tutulmuş məbləğdən yuxarı olmayan hədiyyələrin təqdim olunduğu hallara şamil edilmir.
Təhsilverən özünün bilik və bacarıqlarını inkişaf etdirməli, davamlı peşəkar inkişafı, eləcə də nitqində Azərbaycan ədəbi dilinin normalarına riayət etməlidir.
Təhsilverən təhsilalanların rifahı və öyrənmələri üçün dəstəkləyici, inkişafetdirici, sağlam və təhlükəsiz mühitin qurulmasını təmin etməlidir. Təhsilverən dövlət əmlakından şəxsi maraqlar, habelə xidməti vəzifələrinin icrası ilə əlaqədar olmayan digər məqsədlər üçün istifadə etməməlidir.
Bu qaydalar bütün növ təhsil müəssisələrində çalışan təhsilverənlərə şamil edilir.
