Mərkəzi Gömrük Hospitalında nadir əməliyyat icra olunub. Bu haqda bu gün, 19 oktyabr tarixində Bakuplus.az Azərtac-a istinadən xəbər verir.
Mərkəzi Gömrük Hospitalının Uşaq cərrahiyyəsi şöbəsinin rəisi, uşaq cərrahı Vüsal Cəfərov anadangəlmə kloakal ekstrofiya problemi olan uşaq üzərində 9 saatlıq əməliyyat icra edib.
Əməliyyat zamanı vagina ayrılıb, mövcud olmayan bağırsaq yenidən bir əzələ kompleksi içərisinə yerləşdirilib və yenidən anus yaradılıb. Göbək ilə qasıq arasında defekt aradan götürülüb, orqanlar qarın boşluğuna yerləşdirilib. Bu ağır əməliyyatdan 7 gün keçməsinə baxmayaraq, xəstənin vəziyyəti yaxşıdır, o, Reanimasiya şöbəsindən palataya keçirilib, tam qidalanır.
Kloakal ekstrofiya – sidik kisəsinin açıq olması və çöldə olmasıdır, uşaq bu şəkildə doğulur və eyni zamanda bu problemlə yanaşı, sidik kanalı, vagina və anus bağırsağın alt hissəsində - üçü 1 kanalın içində yerləşir. Bu problem dünyada yarım milyondan bir uşaqda rast gəlinir.
