Bu gün, 15 fevral tarixindən etibarən ölkədə plastik torbalar ödənişli olub. Nazirlər Kabinetinin qərarı ilə ətraf mühiti qorumaq məqsədilə plastik paketlərin pulsuz verilməsi dayandırılıb.
Bakuplus.az komandası paytaxtın əsas böyük marketlərini ziyarət edərək, paketlərin qiyməti və mövcud olan alternativ təklifləri araşdırıb.
Belə ki, bütün marketlərdə paketlər ölçüdən asılı olaraq, orta 3, böyük isə 5 qəpiyə satılır. “Rahat” marketlər şəbəkəsində sadəcə şəffaf paketlər hələ ödənişsiz təklif olunur.
Alternativ olaraq, hazırda ekoçantaların dəbə düşməsi gözlənilir. Biz bunu da araşdırdıq. Marketlərin arasında “Araz” və “Spar” öz ekopaketlərini satırlar. “Bravo”da bir neçə ildir ki, satılan çantalar əksinə, hazırda tapılmır. Satıcılar bildirirlər ki, bir müddətdir həmin məhsul mağazalara gətirilmir.
“Grandmart” və “Bazarstore” isə heç bir ekopaket təklif etmir, plastik torbaları isə standart qiymətlərə satışa çıxarıblar.
