Onu masaj edən qadına saxta pul verən şəxs barəsində hökm oxunub. Bu haqda bu gün, 7 iyun tarixində Bakuplus.az Oxu.az-a istinadən xəbər verir.
Bakı Ağır Cinayətlər Məhkəməsinin verdiyi qərara əsasən, Rauf Bayramov (soyadı şərti) 10 il müddətinə azadlıqdan məhrum edilib.
Hadisə cari ilin yanvar ayında baş verib. Təqsirkar elan saytlarının birində yerləşdirilmiş "Masaj xidməti" adlı elanla əlaqədar zərərçəkmiş Maya Quliyevanın (şərti) xidmətlərindən yararlanmaq istəyib. Daha sonra o, qadına saxta 100 AZN-lik əsginas verərək əvəzində qaytarılan 50 AZN-i götürüb.
İlkin masaj prosedurunu başa çatdırdıqdan sonra Rauf təkrarən masaj olunmaq istədiyini bildirib, növbəti dəfə üzərində etibarsız yazısı olan 100 manatlıq pul əsginasını Mayaya təqdim edib.
Bu zamana zərərçəkmiş pulların saxta olduğunu anlayıb və təqsirkara verdiyi pulu geri qaytarmasını, əks-halda 102-yə zəng edəcəyini deyib. Rauf üzərindəki ov bıçağını çıxarıb Mayanın üzərinə hücum edib. O, bıçağın arxa hissəsi ilə qadının qarnından vurub, onun əlində saxladığı 50 AZN pulu, qonaq otağında olan 160 AZN pulu və zərərçəkmiş şəxsə məxsus 80 AZN dəyərində "Samsung" markalı telefonu ələ keçirərək hadisə yerindən uzaqlaşıb.
