Ötən il Masazır gölündə suyun səviyyəsi xeyli azalıb. Milli Hidrometeorologiya Xidmətinin Hidrometeoroloji Araşdırmalar Mərkəzinin direktoru Rafiq Verdiyev bu gün, 7 oktyabr tarixində Trend-ə rəsmi açıqlanma verib.
O bildirib ki, suyun səviyyəsi gölə axıdılan çirkab suların qarşısının alınması səbəbindən azalıb. Son illərdə tullantıların və çirkab suların gölə axıdılmasının qarşısını almaq üçün tədbirlər görülmüşdür. Bu səbəbdən suyun səviyyəsi aşağı düşüb. Həmçinin, suyun səviyyəsinə qlobal istiləşmə və yerli quraq iqlimi təsir edir.
Sahəsi 10 kv. kilometr olan Masazır gölündən 1813-cü ildən duz hasil olunur. Gölün qida duz ehtiyatları təxminən 1735 milyon ton təşkil edir. Əvvəllər duzu kustar üsulla əldə edirdilər. 2010-cu ildən ərazidə “Azərduz” İstehsalat Birliyinin Duz Zavodu fəaliyyətə başlayıb. Zavod ildə 50-90 min ton aralığında duz istehsal edir.
