Abşeron rayonu Masazır kəndinin sakinləri demək olar, hər gün üzləşdikləri kommunal problemlərdən təngə gəliblər.
Bakuplus.az-a müraciət edən şikayətçilər müxtəlif instansiyalara müraciət etdiklərini, lakin boş vədlər eşitdiklərini və acınacaqlı vəziyyətin davam etdiyini bildiriblər.
"Yağış yağanda, külək əsəndə qaz və elektrik təchizatının kəsilməsinə artıq adət etmişik, halbuki normal halda belə olmamalıdır. Lakin indi, aprel ayının ikinci yarısında belə fasilələr nə üçün baş verməlidir? Dünən, aprelin 15-də təqribən 10 saat qaz verilmədi. Bu gün isə işıqlar kəsilib. Dərdimizi kimə deyək? Ümumiyyətlə "Azəriqaz", "Azərişıq" nəyə görəsə məsuliyyət daşıyırlar? Ya vəzifələri ancaq camaatdan pul yığmaq, ödəməyə imkanı olmayanlara xidməti tam dayandırmaqdan ibarətdir?" – masazırlılar gileylərini ifadə ediblər.
Kənd sakinləri məsul qurumlardan sözügedən yaşayış məntəqəsində kommunal xidmətlərin fəaliyyətində hökm sürən məsuliyyətsizliyə və qeyri-peşəkarlığa qısa müddətdə son qoyulmasını tələb edirlər.
