Vətəndaş İbad Adıgözəlov Abşeron rayonunun Masazır qəsəbəsində yerləşən, ailəsinə məxsus 30 sot torpaq sahəsinin qanunsuz şəkildə başqa şəxsə satıldığını iddia edib.
O bildirib ki, ərazi 2006-cı ildə Masazır bələdiyyəsindən rəsmi qaydada və dövlət rüsumu ödənilməklə alınıb. Lakin sonradan əraziyə baxış zamanı hasarın söküldüyünü və tikinti işlərinin aparıldığını görüblər.
İ.Adıgözəlov deyib ki, torpaq sahəsi ilə bağlı sənədlər, o cümlədən arxiv materialları onların mülkiyyət hüququnu təsdiqləyir. O iddia edib ki, Elşən adlı makler həmin ərazinin ona məxsus olduğunu bildirərək, torpaq sahəsini bələdiyyədən aldığını deyib. Vətəndaşın sözlərinə görə, torpaq sahəsi sonradan hissələrə bölünərək başqa şəxslərə də satılıb və o, məsələnin araşdırılmasını tələb edir.
Digər tərəf - Elşən Nəbiyev isə ittihamları qəbul etmir. O, torpaq sahəsinə dair çıxarışının olduğunu və ərazinin vaxtilə hərrac yolu ilə satıldığını bildirir.
Daxili İşlər Nazirliyindən verilən məlumata görə, faktla bağlı polis tərəfindən araşdırma aparılır. Nəticədən asılı olaraq qanunvericiliyə uyğun tədbirlər görüləcək.
Mənbə: milli.аz
