Bakının Nizami rayonunda yaşayan Cavid Məmmədov “Access Bank” əməkdaşlarının onu təhqir etməsindən şikayətçidir.
Bununla bağlı Bakuplus.az-a məlumat verən Cavid Məmmədov bildirib ki, bankın Elçin Sərkərov adlı əməkdaşı ona və bacısına hədə-qorxu gəlib, onları hədələyib.
Şikayətçinin sözlərinə görə, aprel ayının 11-də adıçəkilən bankdan 11600 AZN pul götürüb, zamin isə bacısı olub: “Kredit götürmək istəyəndə Elçin Sərkərov bildirdi ki, başqa iki yerdə də az miqdarda kreditiniz var. Dedim lazımi məbləği verin ki, o borcları da bağlaya bilim. Vermədilər. Həmin gün kreditlərimdən birini bağladım, çeki göndərdim həmin adama. O biri kreditimin hamısını əldə qalan pulla bağlaya bilməyəcəyimi söylədim. Həmin günün axşamı saat 21.30-da Elçin Sərkərov zəng edib qışqır-bağır saldı, məni təhqir etdi, hədə-qorxu gəldi. Aramızda mübahisə yarandı. Elçin sonrakı günlərdə də mənə və bacıma zəng edib hədələdi, təhqir etdi. Bankın qaynar xəttinə zəng etdim, Elçin haqqında şikayətimi bildirdim. Bu gün mənə zəng vuran, özünü Elçinin müdiri kim təqdim edən Elmar Allahverdiyev adlı şəxs də mənimlə kobud danışdı, şəxsiyyətimi təhqir etdi, alçaltdı, bizim başımıza oyun açacağını söylədi”.
Cavid Məmmədov başına gələnlərlə bağlı polisə məlumat verib, polisdən bildirilib ki, məsələ ilə bağlı araşdırma aparılacaq.
“Access Bank”a sorğu ünvanlanıb.
