Bakıda 4 milyon manatdan çox vergi borcu olan "5A Construction" Məhdud Məsuliyyətli Cəmiyyətinin (MMC) baş direktorunun həbsi tələb edilib.
Qaynarinfo.az-ın əldə etdiyi məlumata görə, 1978-ci ildə Bakı şəhərində anadan olan şirkətin qanuni təmsilçisi və baş direktoru Məmmədov Elşən Qərib oğlu barəsində "Met-Ak" MMC məhkəmə iddiası qaldırıb.
Şirkət direktoruna İnzibati Xətalar Məcəlləsinin 528.1-ci maddəsi irəli sürülüb. Həmin maddəyə əsasən, icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsinə və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsinə görə fiziki şəxslər 500 manatdan 1000 manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər 1200 manatdan 2500 manatadək, hüquqi şəxslər 3000 manatdan 5000 manatadək məbləğdə cərimə edilir.
İşə Bakı Kommersiya Məhkəməsində baxılıb. Məlum olub ki, "5A Construction" MMC-nin baş direktoru Elşən Məmmədovun "Met-Ak" MMC-yə 159.191,65 manat məbləğində borcu var.
Məhkəmə Elşən Məmmədovun həmin borcunun "Met-Ak" MMC-yə ödənilməsi barədə qərar verib. Həmçinin şirkət rəhbəri İXM-in 528.1-ci maddəsində nəzərdə tutulmuş inzibati xətanı törətməkdə təqsirli bilinərək, 1200 manat məbləğində cərimə edilib və ona son xəbərdalıq olunub.
Qeyd edək ki, "5A Construction" MMC (VÖEN: 1505073321) 10.06.2020 tarixində dövlət qeydiyyatına alınıb. Şirkətin nizamnamə kapitalı 10 manat, qanuni təmsilçisi Məmmədov Elşən Qərib oğludur. Hüquqi ünvanı Az169, Bakı Şəhəri Nərimanov Rayonu, Cıdır döngəsi 1-ci, ev 7-də yerləşir. Şirkətin hazırda İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə 4 milyon 369 min 350 manat 18 qəpik vergi borcu var.
