Bakı şəhərinin Sabunçu rayonu, Ramana qəsəbəsinin "Sovxoz - Ramana" adlanan ərazidə yerləşən göllə bağlı sakinlərin şikayəti var.
Bakuplus.az-a müraciət edən sakinlərin sözlərinə görə, evlərin arxasında yerləşən göldən ətrafa xoşagəlməz qoxular yayılır. Əraziyə ətrafdan zibil gətirilərək atıldığı, yağışlı havalarda isə vəziyyətin daha da pisləşdiyi bildirilir.
Vətəndaşlar qeyd edirlər ki, həmin ərazidə xalça yuma şirkəti fəaliyyət göstərir və yuyulan xalçaların çirkli suları gölə axıdılır. Onların sözlərinə görə, bəzi şəxslər ərazini boş sahə hesab edərək bura məişət tullantıları atırlar.
Sakinlər aidiyyəti qurumlardan gölün doldurularaq qurudulmasını və ərazidə sanitariya vəziyyətinin yaxşılaşdırılmasını xahiş edirlər.
"Biz də sağlam mühitdə övladlarımızı böyütmək istəyirik. Xahiş edirik, aidiyyəti qurumlar bu məsələyə diqqət yetirsinlər və vəziyyətin yaxşılaşdırılması üçün tədbir görsünlər", – sakinlər bildiriblər.
