Bakıda Ümrə ziyarətinə getmək istəyən ər-arvada qarşı dələduzluq edilib.
56 yaşlı Sərxan İsayev (şərti adla) Ümrə ziyarətinə getmək istəyən iş yoldaşı Fuada (şərti adla) kömək edəcəyini deyib. Bunun üçün ondan 2210 manat pul istəyib.
Fuad bu pulu tapmaq üçün dost-tanışından borc almağa məcbur qalıb. Belə ki, o, ABŞ-də yaşayan bir tanışından 1360 manat, Bakıda yaşayan tanışından isə 850 manat pul istəyib. Sonradan həmin pulları geri ödəyib.
Lakin Sərxan İsayev isə verdiyi vədə əməl etməyərək, ər-arvadı arzusunda olduqları Ümrə ziyarətinə göndərməyib. Aldandığını görən Fuad hüquq-mühafizə orqanlarına şikayət edib.
S. İsayev saxlanılıb və barəsində cinayət işi açılıb.
Təqsirləndirilən şəxs ifadəsində əməlindən peşman olduğunu bildirib. Onun sözlərinə görə, Fuada pulları hissə-hissə ödəməyi təklif etsə də, zərərçəkən razı olmayıb. Zərərçəkən Fuad da həmçinin dəyən ziyanın ödənilmədiyini bildirib.
Məhkəmənin qərarı ilə Sərxan İsayev 2 il müddətinə azadlığın məhdudlaşdırılması cəzasına məhkum edilib.
mənbə: lent.аz
