Xətai rayonu, Naxçıvan küçəsində yerləşən pivə zavodundan Xəzər dənizinə çirkab suların axıdılması ilə bağlı araşdırmaya başlanılıb.
Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti Bakuplus.az-ın sorğusuna cavab olaraq bildirib ki, sosial şəbəkələrdə yayılan məlumat əsasında sentyabrın 9-da ərazidə araşdırma aparılıb.
Araşdırma zamanı tullantı suyunun tərkibinin müəyyənləşdirilməsi məqsədilə ərazidən su nümunələri götürülərək analiz üçün Xidmətin tabeliyində fəaliyyət göstərən Mərkəzi Laboratoriyaya təhvil verilib.
Bildirilib ki, analiz nəticələri məlum olduqdan və araşdırma yekunlaşdıqdan sonra iş üzrə toplanmış materiallar hüquqi qiymət verilməsi üçün hüquq-mühafizə orqanlarına göndəriləcək.
Qeyd edək ki, analoji məsələ ilə bağlı cari ilin may ayında keçirilən nəzarət tədbirləri zamanı Bakı şəhəri, Xətai rayonu, Pivəzavod küçəsində fəaliyyət göstərən "Alko LMD Azər Spirt 2024" MMC-yə məxsus spirtli içkilər istehsalı zavodunda tullantı sularının əvvəlcə açıq axarla, daha sonra isə diametri 300 mm olan yeraltı plastik boru vasitəsilə Xəzər dənizi istiqamətində axıdıldığı müəyyən edilib.
Xidmətin məlumatına görə, həmin faktla bağlı materiallar dəniz ətraf mühitinin çirkləndirilməsi və su ehtiyatlarının çirkləndirilməsi ilə bağlı cinayət tərkibinin əlamətləri olduğu nəzərə alınaraq, pozuntunun qarşısının alınması və məsələyə hüquqi qiymət verilməsi üçün Daxili İşlər Nazirliyinin aidiyyəti qurumuna göndərilib.
***
Xətai rayonu, Naxçıvan küçəsində yerləşən pivə zavodundan Xəzər dənizinə çirkab sular və xoşagəlməz qoxuya səbəb olan maddələrin buraxıldığı iddia olunur.
Bakuplus.az-ın məlumatına görə, burada yaşayan vətəndaşlar bildirirlər ki, ərazidə üfunətdən dayanmaq mümkün deyil və dənizin çirklənməsi ətraf mühitə ciddi zərər vurur.
Onlar Ekologiya Nazirliyinin məsələ ilə bağlı araşdırma aparmasını və müdaxilə etməsini istəyirlər.
Məsələ ilə bağlı Suların İstifadəsinə və Mühafizəsinə Dövlət Nəzarəti Xidmətinə sorğu ünvanlanıb.
