Azərbaycanın Xalq artisti, Azərbaycan Dövlət Rus Dram Teatrının baş rejissoru, Bakıdakı Avropa yəhudiləri icmasının rəhbəri Aleksandr Şarovski vəfat edib.
Bakuplus.az xəbər verir ki, rejissorun vəfatı ilə bağlı Birinci vitse-prezident Mehriban Əliyeva başsağlığı verib.
"Aleksandr Yakovleviç Şarovski. Məkanın cənnət olsun, böyük Ustad!" - Mehriban Əliyeva sosial şəbəkə hesabında yazıb.
Qeyd edək ki, Xalq artisti uzun müddət xəstəlikdən əziyyət çəkirdi. Onun müalicəsini Heydər Əliyev Fondu üzərinə götürmüşdü.
Şarovski 1948- ci ildə Bakıda anadan olub. Azərbaycan Dövlət Xarici Dillər İnstitutunda təhsil alıb.
O, aktyor kimi həyat verdiyi Rezo ("Premyera", L.Roseb), Eldar ("Qum üzərində ev", R.İbrahimbəyov), Şeyx Sənan ("Şeyx Sənan", H.Cavid), Fərhad ("Fərhad və Şirin", S.Vurğun), Henrix ("Kral Lir", V.Şekspir), Mehmandarov ("Neft bumu", M.İbrahimbəyov) - ümumilikdə 50-dən çox obraz tamaşaçılar tərəfindən maraqla qarşılanıb. Sənətkar eyni zamanda "Yarımçıq qalmış mahnı" (1979), "Anın quruluşu" (1980) "Qorxma, mən səninləyəm" (1981) və "Lətifə" (1989) filmlərində çəkilib, televiziya tamaşalarında maraqlı rollar oynayıb.
O, respublikanın "Əməkdar artist" (1987), "Xalq artisti" (1998) fəxri adlarına, "Şöhrət" (2008), "Şərəf" (2018), "Prezidentin fəxri diplomu" (2023) ilə təltif edilib. 2005-ci ildən Prezidentin fərdi təqaüdçüsü idi.
