Metronun “28 May” stansiyasında eskalator təmir olunacaq. Bu haqda bu gün, 30 may tarixində Bakuplus.az Bakı Metropoliteninə istinadən xəbər verir.
“28 May” stansiyasının ikinci çıxışında 2010-cu ildən istismarda olan “ET-3M” tipli üç eskalatordan biri 3 iyun tarixindən etibarən əsaslı təmirlə əlaqədar dayandırılır. Texniki tələblərə görə, bu tip eskalatorlar 150.000 km qaçış məsafəsini qət etdikdən sonra təmir olunmalıdır.
Təmir müddətində qaynaq işləri yalnız gecə növbəsində nəzarət altında yerinə yetiriləcək. İlk olaraq sürahi elementlərinin söküntüsünü aparmaq üçün lent zolağının daraqdan darağa olan 71 m-lik hissəsindəki 392 pillə demontaj edilərək təftiş olunacaq, eskalatorun dartı zənciri, əyləc sisteminin elementləri, reduktor və mühərrik çıxarılaraq müayinə ediləcək.
Daha sonra növbəti mərhələlərə keçid ediləcək.
Bu tip eskalatorların istismar müddəti 40 ildir.
